Management

Gebore in Lydenburg en grootgeword in Middelburg waar ek steeds vandag woon. Ek het rekenaarprogramering studeer en is daarna getroud. Ek is ‘n trotse ouer van drie jong manne en my hoogste roeping in die lewe - om ouma te wees van twee pragtige kosbare klein dogtertjies. Ek het by VLU Meyersbrug tak aangesluit in 1999 as ‘n skamerige jong vrou met drie woelwaters en voltyds in ons eie besigheid gewerk. VLU het nie op haar laat wag nie en ek is verkies as sekretaresse en later as voorsitster van my tak. ‘n Paar jaar later verkies as Kosmosstreek se voorsitster. Ek het die Magrietjie tak gestig in 2017 en is lid van die jolige klomp leergierige dames. Ek hou van tuinmaak, bak en brou, lees en my kleindogtertjies te leer van inmaak, koekies bak en plante se name te leer. Rond ry is my lekkerste stokperdjie en om ons lieflike  land te verken. Alles wat ek vandag weet – het ek  by VLU of as gevolg van VLU geleer. As jy nou hier lees, het jy ook ‘n leergierige gees en  nooi ek jou om aan te sluit by jou naaste VLU tak. Jou lewe word verryk met kennis, vriendskappe en jou talente gaan beslis ontdek word.

Groot geword en gematrikuleer in Elsburg.  Getroud met my kinderjare liefde in 1985 en is baie trots op by 3 kinders, al 3 gelukkig getroud en 5 kleinkinders. Ons het verskeie kere verhuis: van Pretoria (10  jr)  na Parys (8 jr)  toe na Potchefstroom vir 7 jaar. Daarna na Reddersburg vir  3.5 jaar  en nou in Empangeni vir die afgelope 9 jaar.  In Reddersburg het ek vir die eerste keer te doen gekry met die VLU. Wat 'n dinamiese groupie vroue.  Spoedig was ek die ondervoorsitter. In Empangeni het ek dadelik die VLU opgesoek en toe gehoor maar in Natal is dit die FWI. (Federation of Womens Institute). Wel, binne 'n paar maande was ek die President van die Empangeni tak, vir 4 jaar die 1st visie Streeksvoorsitter en toe vir 4 jaar Streeksvoorsitter. September 2022 het ek die groot voorreg gehad om as FWI Presidente verkies te word.  My passie is bejaardes, bake n brou en kreatiewe kuns. (Mosaik, papierwerk ens). Ek sien uit na die tydperk wat voorlê en vir nog 'n uitdaging om van 'n sukses te maak.

Die opdrag van ons SA President is: “Stel jouself voor sodat ons jou beter kan leer ken.”Sjoe, dit dwing mens tot stillstand as jy oor jouself begin dink. Skielik sien mens net al die goeie en mooi in jou lewe raak, besef ek dat die moeilike dinge wat ek al deurleef het, sommer vaag raak. My ma het aan die Vlu in Pretoria behoort dus, toe ek later in ‘n boerderygemeenskap introu met ‘n skoonma wat óók ‘n gesoute Vlu-vrou was, was die druk daar om ook aan te sluit. Ek het egter volstaan dat ek eers sou kinders grootmaak. Toe my oudste seun begin skoongaan, sluit ek op nege-en-twintig by Platrand Vlu-tak aan. So word Vlu ‘n leefwyse oor Twee-en-Dertigjaar. Ontdek ek talente en slyp ek saam met vriendinne vaardighede. In ons gemeenskap word die Vlu-dames hoog aangeslaan en vorm inderdaad die ruggraat wat die gemeenskap dien.  My man, Johan, het aan my die vryheid gegee en aangemoedig om alles wat Vlu bied te doen want hy kon sien dat dit my gelukkig maak. Vlu het ‘n belangrike balans aan my lewe gegee. Wanneer ek ‘n Vlu-dag gehad het, het ek  herlaaide energie gehad vir ons vyf kinders met hul uiteenlopende unieke geaardhede. Ons gesin wat nou almal getroudes is en sewe kleinkinders, is almal buitelugmense. Met die vryheid wat die plaaslewe bied speel ons nou-nog Krieket en Jukskei wanneer ons by mekaar kuier. Ons ry graag lang afstande met ons kwadfietse en sal maklik die honderd kilometer Vrede toe grondpadlangs aandurf. Hierdie het ‘n jaarlikse instelling in die buurt geword, ‘n hele paar gesinne neem deel aan die uitstappie. Ek het tot so tien jaar gelede die rit met my motorfiets aangepak, maar baie seer geval. My man het onmiddelik my motorfiets verkoop. My lewe in ‘n neutedop is geseënd, met gesonde balans. Die Vlu-pad wat ek nou stap is ‘n uitdaging waarna ek opgewonde uitsien. Ek is dankbaar vir die geleentheid om terug te ploeg in die organisasie waarvoor ek lief is. Hierdie is tyd om herinneringe te skep vir eendag …

Dit is altyd moeilik om myself aan mense bekend te stel wat my nie ken nie, die beste manier om my te leer ken is om die lewenspad saam met my te stap. Ek is gebore in Windhoek en bly nog steeds in ons mooi land Namibië met die  gasvryste  mense. 'n Land met uiterstes en uitdagings wat onder jou vel kom inkruip. Ek is die afgelope 15 jaar in die eiendomsbedryf, wat jou deursettingsvermoë leer. Ek hou van 'n uitdaging, is positief, die glas is altyd half vol en was van jongs af in leiers posisies. My voorliefde as Boskok is om toergangers te bederf met kampos in die bos gemaak op vuur, toere deur Namibië, Angola, Botswanna, Zambië, asook Suid-Afrika verbreed jou kennis van mense en plekke. Die Namibiese Vroue Vereniging is al 34 jaar deel van my lewe en ek sien uit daarna om ons Vereniging te lei, saam met die dames.

Gebore aan die voet van die Soutpansberg, Louis Trichardt wat ek nog steeds my tuiste noem. Is betrokke by die plaaslik Rotary Klub hierdie jaar die President Ann. In 1995 sluit ek by Hanglip-tak aan. Stig 29 Okt. 2002 ‘n aand tak Aandblom, waar ek ook lid is, sedert die stigting. November 2003 begin ek my eie 24/7 besigheid, maar bly steeds voltyds betrokke by my man se besigheid. Is vanjaar 28 jaar getrou met John. Ons dogter Vinita is van jaar 23 jaar oud en het van jaar begin met haar artikels by ‘n Ouditeursfirma in Pretoria. Tans is die beoefening van ‘n stokperdjie ‘n gedagte! Rondloop is egter hoog op my lysie, is bevoorreg om te kan sê, dat ek ‘n hele paar plekke in SA, Namibië, Swaziland en Botswana al besoek het en so paar plekke oor die groot water. Lees, fliek, bak en handvlytmaak ook deel uit van my belangstellings, maar tans is tyd my grootste tekort.

Gerda Swart (nee Badenhorst), het groot geword as plaaskind in Coligny omgewing, getroud met Andries met  'n rykdom van 3 dogters, 2 skoonseuns en 4 kleinkinders.  Skoolloopbaan voltooi in Coligny en verdere studies in Pretoria. Ek en my man woon tans in Lichtenburg. Sluit in 1987 by Lichtenburg tak aan vir 2 jaar, 2002 sluit ek by Dorwo tak aan, dien 2 jaar as visevoorsitster, 5 jaar as takvoorsitster en 3 jaar tesouriere.  Op Streekvlak het ek 4 jaar gedien as tesouriere, 6 jaar as Sonneblom Streekvoorsitster en 4 jaar as Noordwes visepresidente. Ek hou baie van preservering, gebak, kunsvlyt, fotografie en blommerangskikking. Woon graag alle VLU- geleenthede by. Elke geleentheid word deur my beskou as 'n uitdaging waar jy jouself kan verryk met kennis. Is lief vir tuinmaak, seil, hekel, stap en doen Aqua-aërobiese oefeninge om fiks te bly. Ek en my man is lief vir die natuur, ons toer graag in die wildernis saam met geliefde vriende en familie. VLU is vir my 'n wonderlike leerskool, ek glo mens groei wanneer jy ervaring, talente en kennis met ander kan deel. Ek is dankbaar vir die voorreg om deel te kan wees van hierdie wonderlike organisasie.

Ek is ‘n Pretorianer in murg en been. Ek is in Pretoria gebore, het hier skoolgegaan en verwerf ‘n graad aan die Universiteit van Pretoria. Ek woon steeds in die pragtige Jakarandastad. Ek is getroud met ‘n wonderlike, geduldige man en het twee kinders wat my hart se punt is. Hoewel ek vir jare was jare betrokke was by volwasse onderrig met die fokus, op leierskap bedryf ek en my man saam ‘n staalkonstruksie besigheid. ‘n Boek hou vir my bekoring in en ek kan myself daarin verloor, ek geniet dit ook om kreatief wees want dit is goed vir my siel. Ons hou van kamp en geniet die Kruger Wildtuin. Mosambiek is my hartsplek en dit is waar ek op my gelukkigste is. Die VLU het begin as ‘n aktiwiteit wat ek saam met my ma kon doen. Hier is ek steeds 24 jaar later. Ek was vir 9 jaar Monumentpark-tak se takvoorsitter, ses jaar Jakarandastreek se Streekvoorsitter en vir 6 jaar VLU Overvaal se Visie-President. Die VLU as organisaie het soveel om vir vroue te bied. Dit is ‘n voorreg om deel te wees van hierdie verrykende organisasie.

Ek is gebore in die Vrystaat en bring my kinderjare deur in Bloemfontein en later in Namibië. Na matriek, studeer ek Voedseldiensbestuur aan die Technicon OVS. Ek is getroud met Bokkie Kotzè, ‘n boer in die Jagersfontein-distrik. Ons het drie pragtige seuns, wat vir ons baie kosbaar is. Ons oudste seun, WJ, is onlangs getroud en het ons ‘n liewe dogter, Esmari, ryker geword. Heinrich studeer tans by Kovsies en Riaan, ons jongste, is in Graad 9. My man en kinders deel my passie vir VVLU! ‘n Voorreg waarvoor is ek ongelooflik dankbaar is! Ek sluit in 2007 by Jagersfontein VLU aan, waar ek vir die afgelope 11 jaar die voorsitter is. Ek word in 2019 Area 10 se Uitvoerende Bestuurslid. Ek glo dat ‘n mens nooit te oud is om te leer nie! Ek het geleer dat VVLU nie net daar is vir vroue wat alles kan doen nie. Belangrike waardes wat ek in my jare by VVLU geleer het, is:

hou aan groei, want jy deel ervaring, kennis en talente met ander;ontdek jou talente en ontgin deur gebruik te maak van jou vaardighede, kreatiwiteit en kunstigheid;volhard tot jy wen, maar wees ook ‘n goeie verloorder; omring jou met ‘n groep positiewe vroue wat jou kan opbou en ondersteun;om met mense saam te werk, in moeilike tye saam te staan, mekaar en jou gemeenskap te dien;om ‘n verskil te maak in ander vroue se lewens.

VVLU het baie meer as net vriendinne op my pad gebring! Ek het die geleentheid gehad om my menswees en vrouwees uit te leef. Ek glo VVLU hét steeds ‘n plek in die hede en die toekoms. Alhoewel die internet jou baie kan leer, skep VVLU ‘n omgee-omgewing, waar ons die geheime en kortpaaie kan leer. Die herbekendstelling van VVLU aan vroue, veral jong vroue, glo ek is baie belangrik. Die voortbestaan van ons organisasie hang van my en van jou af. Positiwiteit is aansteeklik! Wees positief en opgewonde as jy oor VVLU praat en jy sal sien dat almal om jou, saam met jou positief sal wees.